Ш. Берсеевтің ескерткіш-мүсіні

Тарихи мәліметтер: Шығанақ Берсиев 1881 жылы Ойыл ауданы, Ащы Ойыл ауылдық кеңесіндегі қарапайым шаруаның отбасында дүниеге келген. 7 жасында Орал қаласындағы екі кластық орыс мектебіне ауызша есепке қабылеттілігімен, аса зеректігімен оқуға қабылданады, кейін елін сағынып қайтып келеді. Ойылға қайтып оралған ол Көкжар жәрмеңкесіндегі шайханада есепші болып жұмыс жасайды. 1929 жылы колхозға кіріп, қатардағы колхозшы, кейін оның белсенді ұйымдастырушысы болады. 1935 жылдары тарының өнімді деген бастарын жинап, тек сұрыпталған тарыны егуге кіріседі. 1940 жылы 32 гектардың әр гектарынан 87,5 центнер, 4,5 гектардың әр гектарынан 102,7 центнер, 3,25 гектардың әр гектарынан 125 центнерден өнім алып алғашқы рекордына қол жеткізеді. Шығанақ осы алғашқы табысы үшін Ленин орденімен марапатталды. 1943 жылы әр гектардан 201 центнер өнім алып төртінші әлемдік рекордын жүзеге асырады. 1944 жылы мамырдың 28-не қараған түнде «Құрман» колхозында қайтыс болды.

Ескерткіштің сипаттамасы: Шығанақ Берсиевтің қоладан құйылған мүсіні. Тұғыры бетоннан жасалып, гранитпен қапталған. Ескерткіштің биіктігі – 3,30 м. Тұғырының биіктігі 2,2 м, мүсіннің биіктігі – 1 м. Табанының ұзындығы мен ені – 2,25 м. Тұғырының ұзындығы – 60 см, ені – 64 см. Мүсінші – Ж. Кенбай.